راس حسين ينعه الجسم بدموعه
وجسمه ونًته من النحر مسموعه
-----------
بده الراس ايتكلم والدموع ادموم
ياجسمي افصلونه شلسبب هالگوم
عنك عالرمح وجهي بضرب موسوم
وٍسًموني ابعصيهم حيل وبلوعه
------------
يجسمي ابجبهتي بالحجر ضربوني
صوبني ونزف دمي على اعيوني
انه اعله الرمح والعده اتولوني
عسى ايمين الرمتني بحجر مگطوعه
-----------------
يرد الجسم حسره اتفسر الصخره
ودمعاته يهلها من دمه نحره
يراسي اتعيفني مطروح عالغبره
دربي شلون اشوفه وطافيه اشموعه
-----------------
يراسي الشمر فوگ الصدر گام ايحز
وعظامي المكسره امن الضلوع اتفز
چي لني طعين ابچبدتي وعاجز
چبدي بالمثلث نصها منزوعه
---------
يراسي شذنب اصبعي انگطع بالحربه
وخيل الكسرت صدري شنو ذنبه
يراسي والگلب مايحمل اتعتبه
شرايينه تره امن السحگ مخلوعه
----------------
ظل الجسم من نحره يون وبچاه
من دم الوريد الدمع ليه ابداه
يوميله اعله ظهره ايگله اي مناه
يراسي النبله بين الخرز موضوعه
----------------
ردله الراس من ابرمح شالوني
يالموذر عليك امشوبحه اعيوني
بچيت وحسبت ماظن يردوني
يمك والسهام البيك مزروعه
------------
ماظن نجتمع يالجسم الله اوياك
ماشي ابعيد عنك شايليني اعداك
منهو الي يردنه اوين چا الگك
ياجسمي البصدره امكسره اضلوعه
----------------
اللهم بحق صدر الحسين ع اشرح صدورنا يالله
واجعل لنا من امرنا فرجا ومخرجا يالله وشافي مرضانا
واقضي حوائجنا
يالله يالله يالله
سيد عدنان الحمامي