المستهل
-----
صوت من گبر العقيله -- خويه
راح اجي الكربله اليله -- خويه
كون الگه فاطمه -- يمك وحامي الحمه
بربعينك اي يمظلوم -- خويه
-----------
صوت وشيحمل الصوي اليله برض الشام ينعه
من گبرها اتصيح زينب بالطفوف اخوه تسمعه
راح اجي يحسين يمك للشمل خويه إجمعه
والزهره امي من تحل -- يمك تظل لاترتحل
وينجمع يحسين الشمل -- إمن الگلب نذرف الدمعه
اجت زينب گلها لتروح -- خويه
واشترك ويه امي بالنوح -- خويه
اجي بحزني امحزمه -- واجري دمعاتي دمه
بذيچ لوعاتي والهموم -- خويه
-----------------
خويه لو گبل امي حيدر وصل وتشاهده اعيوني
ارد اراويه جرح گلبي ولوعتي وهمي وشجوني
احچي كل الجره اعليه حتى من ورموا امتوني
وساعة اللي بيها اوگعت -- من خدري مذهوله اطلعت
الله ياصوت اسمعت -- من صحت ياجد ولوني
بعد اسولفله اشجره اعليك -- خويه
ضلع ماخلوا عدل بيك -- خويه
الخيل فصلت كل ضلع -- ابچفك اصبع ينگطع
بعد اخبره اشسوت الگوم -- خويه
------------------
هوه مايدري ابوك شلون من ذبحوا اوليدك
بعيني عبد الله اشوفه ايلوج يامظلوم بيدك
مارضه لاامه ترده ابمنحره النبله ويريدك
والنبله لمن صابته -- طوگت بالدم رگبته
من دم وريده روته -- ايضحي رايد عن وريدك
َطلعَ إمن اگماطه ايده -- خويه
جبته والنبله ابوريده -- خويه
امه من اتلگتك -- ارتوه طفلي نادتك
اخذيه تگلها ابسهم مفطوم -- خويه
-----------------
بعد اسولف للزجيه لوشفتها اهناك يمك
بالضمه وسهم المثلث من گفاك ايسيل دمك
طلع من خرزات ظهرك هم درت يحسين امك
شتگول بس لوشافتك -- إمن المهر صارت طيحتك
والسهم گطًع مهجتك -- ولامعين واخو يمك
كون اگلها ابحجر صابوه -- خويه
شيبه من دم وجهه خضبوه -- خويه
للمثلث من شلع -- چبده ثلثينه طلع
والسهم صوبك مسموم -- خويه
--------------------
خويه والاكبر اگبالك ينولي عينك تنظره
ناس برماح التطعنه وناس بسيوف التطبره
خفت لاتوگع واگولن عفيه اخويه شكبر صبره
صبرك اويه الاكبر وگع -- والد يشوف ابنه انصرع
شريان البگلبك گطع -- گبل عمرك ضحه عمره
طاح ريحانتك يحسين -- خويه
دمعتك سالت امن العين -- خويه
رحت تحظن مهجتك -- ترده خويه الخيمتك
امن اگعدت ماتگدر اتگوم -- خويه
------------------
للهواشم عرس صار ودمعه فوگ الدمعه تجري
وعگب عباس اسمعتلك صوت خويه انكسر ظهري
عالنهر طاح العضيد وهيَست هم طاح خدري
يحسين شفتك ياوضع -- للعلگمي امشيت ابدمع
والزمت بيديك لظلع -- اخذ گتلك خويه عمري
گبل عمرك ريت عمري -- خويه
ولاسمعتك صحت ظهري -- خويه
عگب عباس اشيظل -- راح يحسين الامل
ابگطعة الچفين مهظوم -- خويه
--------------------