المستهل
صعب يبني عليه -- اضيعك من اديه
--------------
تجي يمي يالاكبر لو اجي يمك
گبل متروح يبني اتوادع اويه امك
يازهرة حياتي ورايده اشتمك
يبني امن المنيه روحي اللتظمك
منهو ايظل اليه -- اضيعك من اديه
--------------------
يبني شلون اوصفه اموادعك يبني
رمح فرگاك احس بگلبي صوبني
عذبني وداعك يبني عذبني
وكتي للمناحه شلون لو ذبني
يظل الحزن بيه -- اضيعك من اديه
-----------------
اظلن للمناحه وبالثياب السود
وعيني اعله الدرب يوليدي بلچي اتعود
وحشه الدار عگبك ونته ما موجود
يبني كل ولد لمه ذخر مريود
اتمنيت المنيه -- اضيعك من اديه
---------------
ياتعب السنين وياسهر ليلي
ياشمعة اعيوني اللي تضويلي
بيه شلون اعيش شلون يا ويلي
خذت روحي يالاكبر يبني احچيلي
هم نگعد سويه -- اضيعك من اديه
-----------------------
الله اوياك اودعك للحرب وتروح
وعليك العين تدمي والجفن مجروح
لا تنفع بواچي ولايفيد النوح
شلي بالعمر شلي بعد بالروح
ابطف الغاظريه -- اضيعك من اديه
----------------------
ضيعتك عساني عمري المضيعه
وگبل عمرك حياتي ودنيتي امودعه
گلب امك دمعها بعد شينفعه
ومن بيتي طفولي ياالولد شمعه
اودعك هاي هيه -- اضيعك من اديه
-------------------------
سيد عدنان الحمامي