الكم يشيعه

--

الكم يشيعه -- آنه الشفيعه

كل مآتم أحظر تلگوني -- للواساني اتشوفه أعيوني

آنه الشفيعه

---

آنه الشفيعه الشيعتي -- وكلمن يهل الدمعه

والدمعه لجلي من تهل -- باللحد تصبح شمعه

يالزهره بسمي كل محب -- لوصاح اذني اتسمعه

أحظرله باچر بالگبر -- ومنكر أبد ميفزعه

بگبره أحظره -- وعيني تنظره

ما أنسه بس الينسوني --- للواساني اتشوفه اعيوني

---

بالگبر لوصار المحب -- وحده وتعيفه الاحباب

أحظرله ساعة رهبته -- ويحظر علي داحي الباب

لوأجه منكر ناشده -- ومن المحب راد أجواب

آآنه اسّكن روعته -- حتى ابفزع ماينصاب

اطفي بوحشتّه -- جمرة رهبّته

أسمعكم من اتنادوني -- للواساني اتشوفه اعيوني

---

يالمحب أذرف دمعتك -- أعليّه لتبخل عيناك

وأنصب مآتم للحزن -- آخره اتفوز ودنياك

يوم الحشر عينك تسر -- يالمحب لتظن أنساك

ابساحة القدره حاضره -- ماتحزن آنه وياك

حبي السلامه -- أمن الله كرامه

تفوزون يللي اتوالوني -- للواساني اتشوفه أعيوني

---

أتوالوني هاي الغانمه -- يايشيعه بيها اتفوزون

كل عين الكم بالحشر -- تنسر أبد متحزنون

ابچيتوا على كسر الضلع -- مظلومه من اتنادون

ولحسين ضحيتوا مهج -- بمال وبنين اتضحون

مني شهاده -- نلتوا السعاده

كلكم ياشيعه اتشوفوني -- للواساني اتشوفه اعيوني

---

تشوفوني باچر بالحشر -- من تنحشر كل الناس

الابصار عني من تغض -- وتنخمد كل الانفاس

بس انتو ياشيعة علي -- اهناكه ترفعون الراس

للباري ارفع شكوتي -- وأحمل أچفوف العباس

آخذ مرادي -- أبحگهن أنادي

بيهن ياربي ايفجعوني -- للواساني اتشوفه اعيوني


---

ياربي حگ چف الگمر -- ماريد ضلعي وكسره

وماريد حگي ابكربله - لوليدي گطعوا نحره

وماريد حگ طفله أنذبح -- بيده ويشبگه الصدره

أكراما الهي رايده -- لأام البنين الحُره

وجازي الموالي -- ناح اعله حالي

بدمعات العين ايذكروني -- للواساني اتشوفه أعيوني

-----

سيد عدنان الحمامي