--
الليله وافتها المنيه -- ويلي واويلاه
ويلي عالزهره الزجيه -- ويلي واويلاه
--
فاطمه ودعت عمرها راحت الدمعه ابجفنها
عاشت ابلوعه ومصايب كثره ماتنعد محنها
أمصيبه فوگ أمصيبه شافت والمصايب والفنها
سوده الايام الگظتها والحزن مامال عنها
حملت الظيم وأذيه -- ويلي واويلاه
ويلي عالزهره الزجيه -- ويلي واويلاه
--
بويه بجروح الليالي جيتك البيها عفتني
جيتك الدمعه اعله خدي لا أبد مافارگتني
شده لو راحت تجيني أصعب الشده الاجتني
حتى دمعة عيني بويه جمره عالخد ألمتني
بس حزن يالهادي بيّه -- ويلي واويلاه
ويلي عالزهره الزجيه -- ويلي واويلاه
----
يارسول الله ابوجودك آنه أتباها أبدلالي
بضعه منك ونته يمي رغده بعيوني الليالي
مابچت فد يوم عيني لاحزن مرّ أعله بالي
عاين الوجهي تشاهد صفرة الظيم اعله حالي
ماشفت ليله هنيه -- ويلي واويلاه
ويلي عالزهره الزجيه -- ويلي واويلاه
----
بويه شحچيلك مآسي من غفت عينك عليّه
أوديعتك من ودعتني لأمتك وصيت بيّه
چانوا ايشوفون بويه أشفافك أتقبل أديه
مني سلبوها نحلتي المنك ألچانت هديه
بالوسف أصفگ بديه -- ويلي واويلاه
ويلي عالزهره الزجيه -- ويلي واويلاه
--
بويه دار احزان عندي عگبك وانصب مناحه
لو أجه الليل ابدمعها اعيوني تتنطر صباحه
ماشفت ساعه هنيه ماعشت فد لحظه راحه
بالصدر حسراتي تچوي والگلب اتنزف جراحه
صعبه كل ليله عليه -- ويلي واويلاه
ويلي عالزهره الزجيه -- ويلي واويلاه
--
زينب أويه حسين ظلت والحسن وحسين بالهم
شافوا الضلع التكسر والصدر من ينزف الدم
ياهو يرعاهم يبويه ونته بيهم بويه تعلم
من عگب عيني عليهم هالمصايب كلها تلتم
شر عليهم من أميه -- ويلي واويلاه
ويلي عالزهره الزجيه -- ويلي واويلاه
--
--
موضوع: قصيده للوفاة فاطمه الزهراء 
الإثنين سبتمبر 20, 2010 1:17 am