ابوذيات للسيده زينب 2

---------

سواد الحزن كل الدار لاوين

شيصبره الگلب بجفاك لاوين

ظعنك من حده يحسين لاوين

من يثرب اظن للغاضريه

---------------

الك چم روح من امشيت لابيت

بعد بالگلب لاظل حيل لابيت

يحسين اشيلمنه بعد لابيت

مشيتوا وداركم ظلت خليه

---------------------

الظعن يحدي ابويه حسين يمره

بعد ماگبر جده بحزن يمره

عليله وبالگلب تلتهب يمره

ونار افراگهم تشتعل بيه

-----------------

عليله وماله حيل الگلب بعداك

ولابيه اصبر الروح بعداك

عسى انخسفت يبويه الارض بعداك

ولادارك غدة ظلمه عليه

-------------

عليله شلون اسكن الدمع يادار

ومايرحم زماني عكس يادار

اصبر الروح بيمن بعد يادار

ومشوا اهلي ويلوج الحزن بيه


------------


سيد عدنان الحمامي