المستهل
-------
روحي خذتها اوياك -- متگلي وين الگاك
جاسم رحت ما جيت -- وانه الك حنيت
----------------------
يبني حگها العين تبچي والگلب يشتد انينه
روحي هاي اعليك تنشد ابنچ اتحاچيني وينه
شرد اگلها ودع اهله ومابعد جاسم يجينه
ام لبنها ايحن گلبها الشوفته يشتد حنينه
ام او لد مفگود -- راح وبعد ميعود
يبني عمود البيت -- وانه الك حنيت
----------------------
كل ولد عند امه غالي بالعمر تفدي ولدها
حتى لوچانت تكافح اتكبره او تبذل جهدها
وانه ساهرت اليالي اشما تمر ليله اعدها
چنت اگول ايجازي امه اوليدي اتعابي يردها
ام وگلب ملهوف -- مذبوح ابنها اتشوف
قبلك متت ياريت -- وانه الك حنيت
---------------------
يبني تعب الام لبنها مو شره او بيع او تريده
انه حسبالي التعبته لجلك لامك تعيده
من عسن گطعوا وريدي اولبني ماگطعوا وريده
والحرمني اوليدي منك من عساها انشلت ايده
لفراگه حيل امنين -- متشوفه بعد العين
دم الدمع هليت -- يبني الك حنيت
-------------------
عاتبت يبني وعتابي لوصل يمك اسمعه
ضاعت امالي برحيلك والعمر وياك اضيعه
شلي يوليدي بحياتي ونطفت من بيتي شمعه
ظلمه صارت من اشوفن ما الك يوليدي رجعه
امك واريد اوياك -- يالغَيبَتك دنياك
تنساني ماظنيت -- وانه الك حنيت
-------------------------
يبني فارگتك عساها روحي اللتفارگ بدنها
عگبك الشمات بيه تشتمت يبني لسنها
فرحة المادامت الها رمله ما فرحت بابنها
اتاملت تعلگ شمعته وظلت ابدمعة حزنها
بيك الامل مادام -- يبن الحسن جسام
افرح ردت وبچيت -- يبني الك حنيت
---------------------
يبني هاي اگبال جثتك وگفت بياحاله امك
يم الاكبر يبني نايم وانمزج دمه اويه دمك
بخيمته يبني جمعكم ويجري دمعه حسين عمك
لا اروح او لا اعيفك راح اظل يوليدي يمك
يبني عزيز الروح -- من ايدي وسفه اتروح
يبني شكثر باريت -- وانه الك حنيت
------------------
الشاعر الحسيني
سيد عدنان الحمامي