الوزن تجليبه للقاسم سلام الله عليه

عزيز ابني عليه غيَبوا بدره

هم يرجع بعد وعوينتي اتنظره

----------------------

ام جسام انه اوحَيد العندي

ربيته ابسهر عيني بتعب چبدي

مسعده بيه چنت لن عافني وحدي

وگلب الام بعد عالولد شيصبره

-----------------------

شيصبره الگلب شيصبره لغيابه

وهذا الدار وحشه صارت اعتابه

افرح من يجي اوليدي ويدگ بابه

اتلگاه واشم اخدوده المعطره

------------------

امعطره ارياح ابني وريحته طيبه

ها يُمه اگله ايگلي يحبيبه

ادعيله يربي عني لتغيبه

عسى يوم الفگدته لايطر فجره

------------------

فجر ه لايطر من ريت هالمصباح

من صدري الگلب بيه چن احسن طاح

گالولي عزيزچ راح منچ راح

اصدگ اشلون ضليت اله منتظره

----------------------

اتنطر يجيني وافرح ابملگاه

سلب مني حياتي وعمري راح اوياه

مو وكته يروح اوليدي من دنياه

راح ونار فگده بروحي مستعره

------------------------

مستعره احس النار بضلوعي

الشوفت وجهه زادت حسرتي وروعي

مايطفي الجمر لو سالت ادموعي

والدمعه اعله خدي بيها احس جمره

---------------------



سيد عدنان الحمامي