لوفاة كريم اهل البيت سلام الله عليه

--


المستهل


--


راح الحسن مسموم -- مثل امه هم مظلوم


نعشه رموه بسهام -- عگب المحن وآلام


---


فاطمه راحت حزينه او بالحزن هيه بعدها


عصرة الباب او ضلعها وسطرة الطاغي اعله خدها


الليله هيّه وبلحدها حست اتگطع چبدها


من سره السم وينازع چبدته اتگطعت ولدها


هاجن كسر ضلعين -- بيها وتهل العين


تدري الحسن منظام -- عگب المحن وآلام


---


عالحسن لزمت ضلعها ونصبت اليله مناحه


هيّه لساعه صدرها مابرت منه جراحه


بالدمع ليل التسهره چانت وتبچي ابصباحه


والحسن تعرف مثلها ماتمر بيه لحظه راحه


هيّه الصدر ينصاب -- وچبد الحسن هم ذاب


مارحمته الظلام -- عگب المحن وآلام


--


صاحت ابصوت الظليمه فاطمه واهتز گبرها


يالحسن يبني اشجنيته جازتك ناس ابغدرها


باچر الجدك محمد شنهو شتقدم عذرها


من گبل هامة ابوك ابسجدته الظالم طبرها


ونته بغدر جازوك -- يبني الحسن سمّوك


اهل الغدر واجرام -- عگب المحن وآلام


--


أدري يوليدي المصايب دارت اخلافي عليكم


مارعوا حرمه المحمد نكّلوا يوليدي بيكم


وآنه من لحدي ترفرف روحي وبلهفه تجيكم


انظر بعيني هظمكم حتى چنت اسمع بچيكم


مارحمت الاقدار -- عنكم مشيت أزغار


بعدي صفيتوا أيتام -- عگب المحن وآلام


--


أنه انتظرك تجيني يالحسن وبلحدي أظمك


أرد ابوسك ارد احظنك ياضنايه وارد أشمك


من زمان وانته تدري الشوفتك ملهوفه أمك


آنه بسمار الهظمني واليهظمك انته سمّك


چبدك اشوف اشبيه -- وضلعي تعاين ليه


بيه جرحه مايلتام -- عگب المحن وآلام


--


يبني ليش اسهام نعشك ينرمي أمن اهل اضلاله


هذي ارض البيها جدك هيّه اصلا من حلاله


ياسبب منعوا دفنتك يمه گوم اهل الجهاله


ونته ريحانه المحمد هوه رباك بدلاله


ابن النبي ايعرفون -- سمعوها ويحرفون


منهم بري الاسلام -- عگب الهظم وآلام


--
سيد عدنان الحمامي