المستهل
----------------
يالزاير اگصد للكاظم -- د گ بابه -- دگ بابه
مير د الطالب ميرده --- للكاظم من تگصد عنده
دگ بابه ---- - دگ بابه
---------------
يزاير لوردت للكاظم اتعنه --- باب امراد نعرف للگصد عنه
اطلب حاجتك واطلب شتتمنه --- چم برهان شفنه ومعجزه منه
لوگتله معتاز ايعينك --- دگ بابه --- دگ بابه
چفك بس للكاظم مده --- للكاظم من تدخل عنده
دگ بابه -- دگ بابه
----------------------
چم برهان ماتنعد براهينه --- الأعمه لويطبله ايرد نظر عينه
الكاظم للموالي ابشدته ايعينه --- سولفله يزاير بينك وبينه
اطلب من راعيها الحاجه --- د گ بابه --- دگ بابه
لو واعد مايخلف وعده --- للكاظم من تدخل عنده
دگ بابه --- دگ بابه
-------------------
للكاظم لون مظيوم يالزاير --- مايرضه يشوفك منكسر خاطر
يگضي حاجتك متظل بعد حاير --- من مثله مضيفه بكل وكت عامر
بحر الجود وگاضي الحاجه --- دگ بابه -- دگ بابه
ايخلصك لوطايح بالشده --- الكاظم من تدخل عنده
دگ بابه -- دگ بابه
------------------------
اگصد للمضيف واعتني يمه --- واگعد لوتريد بگبته وكلمه
همك يالموالي الكاظم ايهمه --- بيده لليطبله حاجته ايسلمه
روح وفك احزامك يمه --- دگ بابه --- دگ بابه
الجرح ايامك والله ايضمده --- للكاظم من تدخل عنده
دگ بابه -- دگ بابه
----------------------------
يالهمك كبير وحيرتك دنياك --- ولوعندك عزيز وغاب من عيناك
للكاظم تعنه واخذ رايه اوياك --- يفََرح مهجتك واللي تريده انطاك
ميخجلك من تتعناله --- دگ بابه --- دگ بابه
حملك من ايميل ايسنده --- للكاظم من تدخل عنده ---
دگ بابه --- دگ بابه
-------------------------
شكثر ناس بضريحه اتطوفه وبلهفه --- البيه عله وتوسل علته تشفه
والرايد دوه امن الكاظم الوصفه --- من الله كرامه الشيعته وعطفه
جرب واتعناله ابهمك --- د گ بابه --- دگ بابه
يمه اتوسل باللي اتعبده --- للكاظم من تدخل عنده
دگ بابه -- دگ بابه
-------------------------
اللهم بحق باب الحوائج موسى بن جعفر ومحمد الجواد ع
اقضي حوائدجنا وشافي مرضانا يالله
الشاعر الحسيني سيد عدنان الحمامي
موضوع: النص تجليبه للمام الكاظم عليه السلام 
الإثنين سبتمبر 20, 2010 2:24 am