-----------
يالكاظم دمعتك خلها هماله
اتلگاه للجواد وعاين الحاله
-----------------
يالكاظم ادموعك خل تهل اليوم
وبحرگة گلب عاللي گظه مسموم
والبس للحزن سوده المصابه اهدوم
واگعد لوردت يالكاظم اگباله
---------------
اكباله تگعد ونشده شنو الاسباب
وبعينك تشاهد چبده بالسم ذاب
ماتنفع ملامه ولايفيد اعتاب
سم النال چبدك چبده هم ناله
-----------------
اتلگاه للجواد وياهظم عنده
بكظم الغيظ اجاك ومنگطع چبد
شوفه ياذنب والياجرم عنده
بالسم هالخصم ياوسفه يغتاله
--------------------
يغتاله عليمن سولف انته اوياه
هم مثلك قساوه راوته دنياه
مثل ماتنغدر هذا الغدر يدناه
يالكاظم ومثلك غيبوا اهلاله
--------------------
اهلاله غاب وانصب للحزن مأتم
يالكاظم ومنكم ياچبد يسلم
لوبالسيف لو بالينچتل بالسم
لو من الذبح ماتسلم اطفاله
------------------
بهذا الحال واحدكم بعد واحد
بني اميه وظلمهم للوكت شاهد
الجرايمهم كلمن يطلًع رايد
ينشد كربله اعله حسين واعياله
---------------------
ورثوها البني العباس اعاديكم
اخذوا من بني اميه الظلم ليكم
كلها اتجمعت بحقادها اعليكم
ومنهم للجواد اليوم چتاله
-----------------
سموا للجواد ومن گبل سموك
يالكاظم وچم عام بسجن خلوك
بالسم غدرته الوادم اللي غدروك
ودلالك تفطر مثل دلاله
-----------------
سيد عدنان الحمامي
موضوع: بما انه دفن مع الامام الكاظم عليه السلام 
الثلاثاء سبتمبر 21, 2010 12:51 am